1947 පෙබරවාරි 03වනදා සත්කෝරළයේ පහන් තාරකාවිය ලෙසින් සුවහසක් සිසු කැළගේ දෙනෙත් පාදා, ලෝ ජය කෙහෙළි නංවන්නට සදා දිරි දෙන අක්කර 16කට අධික භූමි ප්රමාණයකින් සපිරුණු කුලියාපිටිය මධ්ය විද්යාලය ආරම්භ කරන ලදී. එවකට අධ්යාපන අමාත්ය සී.ඩබ්ලිව්.ඩබ්ලිව්.කන්නංගර මැතිඳුන්ගේ උදාරතර නිදහස් අධ්යාපනික මධ්ය විද්යාලයීය සංකල්පයට අනුව එලෙසින් කුලියාපිටිය මධ්ය විද්යාලය ආරම්භ වුණි.
ප්රථම විදුහල්පති ලෙස පී.සෙනරත් මහතා විසින් 1947 දී දායාද කළ "මානිවත්ත අභික්කම" හෙවත් නොනැවතී ඉදිරියට යන ඒකායන ආදර්ශ පාඨය පෙරදැරි කරන් දැනුම හා පූර්ණ පෞරුෂයකින් හෙබි දරු පරපුරක් නිර්මාණය කොට බිහි කරන්නට එදා සිට අද දක්වා ම මැදි විදු මව්න්ට හැකි විණි.
ජාතික පාසලක් ලෙසින් 1991 ජූලි මස 23වන දින නම් ලද කුලියාපිටිය මධ්ය විද්යාලය එදා මෙදා තුර ආ දීර්ඝ වූ අභිමානනීය ගමන් මගේ පුරෝගාමීන් ලෙස සිය මෙහෙවර නිසි ලෙස ඉටු කළ විදුහල්පතිවරුන් මෙසේය.
- ආරම්භක විදුහල්පති පී.සෙනරත් මහතා, ලයනල් ලොකුලියන මහතා, ඩී.ජේ.විජේසේකර මහතා, ප්රථම ආදි ශිෂ්ය විදුහල්පති ලෙස සෝමරත්න හේරත් මහතා, ඩී. ඩබ්ලිව්. ජේ. වීරක්කොඩි මහතා, ආර්.ඩී. ඩිරෙක්ස් මහතා හා මධ්ය විද්යාලය නවමු මංපෙතකට හරවාලූ ප්රේමචන්ද්ර දිසානායක මහතා, ඩී.ටී.ඒ.ජේ. දිසානායක මහතා, සී.දසනායක මහතා, ඒ.ඒ. පතිරාජ මහතා, සෝමපාල නාරායන මහතා, එච්.එම්.එන්.හේරත් මහතා හා බී.සී.එස්.විජේසිංහ මහතා එම උදාරතර වූ 76 වසරක අභිමන් දැක්වූ නියමුවාණන් වේ.
- එලෙසින් ආ දිගු ගමන තවත් ආලෝකවත් කරමින් මං පාදන්නට වර්තමානයේ දී ඩී.පී.ආර්.ඩී.චතුරංග මහතා කටයුතු කරයි.
සිසුන් 1600කගෙන්, ගුරුවරුන් 70කගෙන් හා අනධ්යන නිලධාරින් 16කගෙන් සමන්විත වූ 1978 මධ්ය විද්යාලයීය සන්දර්භය, 1994දී සිසුන් 2199කගෙන් හා ගුරුවරුන් 88කගෙන් යුත්තක් බවට පරිවර්තනය වෙමින් වයඹ පුරවරයේ ප්රමුඛ පෙළේ පාසලක් බවට නම් දැරීය. වත්මන වන විට සිසුන් 4030කගෙන්, ගුරුවරුන් 144කගෙන් හා අනධ්යන නිළධාරින් 52කගෙන් සමන්විතව මධ්ය විද්යාලය නොනවතින ගමනක් යමින් සිටී.
පොත පතට පමණක් ම ලඝු නොවූ මැදි විදුහල් ක්රියාවලිය තුළ, අධ්යාපනයට අවශ්ය සියලුම පරිසරය මනාව සකසමින් සිසුන් තුළ උද්දීපනය විය යුත්තා වූ සැඟවුණු සහජ කුසලතා හා නිර්මාණාත්මක, ගවේෂණශීලී බුද්ධියට අවැසි බාහිර ක්රියාකාරකම් සඳහා අවශ්ය ඉඩකඩ සලසමින් සිසුන්ගේ නොනිමි හැකියාවන් උරගා බලා විවිධ වූ ජයග්රහණය මධ්ය විද්යාලය හිමි කරගෙන ඇත.
ඒ අනුව 1992දී, සාමාන්ය පෙළ විභාග ප්රතිඵල අතුරින් දිවයිනේ සයවන ස්ථානයත්, උසස් පෙළ විභාග ප්රතිඵල අතුරින් කුරුණෑගල දිස්ත්රික් ප්රථමයන් රැසක් බිහි කරමින්, සිසුන් 75 දෙනෙකුට විශ්වවිද්යාල වරම් හිමි කර දෙන්නට මැදි විදු මව්න්ට හැකි විණි.
එලෙසම 1962දී කලාප,දිස්ත්රික්, පළාත් සහ ලංකාදීප වොලිබෝල් ශූරතාවය, 1987දී 19න් පහළ වොලිබෝල් පිරිමි ශූරතාවය සමස්ත ලංකා පාසල් ක්රීඩා තරගාවලිය, 1959දී ශ්රී ලංකා බාලදක්ෂ ධජය ජයග්රහණය කිරීම, හර්මන් ලූස් කුසලානය දිනා ගැනීම ආදී වූ සමස්ත ලංකා ජයග්රහණයන් හිමි කරගන්නට මධ්ය විදු දරුවන්ට හැකි විය.
එදා පටන් බාල දක්ෂ ව්යාපාරය, බාල දක්ෂ මානවිකා කණ්ඩායම, ශිෂ්යභට ඛණ්ඩය, සාහිත්ය සංගමය හා පුස්තකාල පාඨක සමාජය වැනි විෂය සමගාමී කටයුතු තිහකට අධික ප්රමාණයක් පැවති අතර වත්මන වන විට නව නිපැයුම් හා රොබෝ තාක්ෂණ සංගමය, ශක්ති මාධ්ය සංසදය, විවාද කවය, විද්යා සංගමය, පුරාවිද්යා සංගමය, තාරකා විද්යා සංගමය හා පරිසරභට සංගමය වැනි ක්රියාකාරී වූ සංගම් සියයකට අධික ප්රමාණයකින් මධ්ය විද්යාලයීය භූමිය සමන්විත වේ.
බොහෝවිට අවධානය දක්වන්නා වූ අධ්යාපනය ලබා දීම හා එක් වූ දැනුමට ම පමණක් නොව, ආකල්ප හා විනයෙන් සපිරි දරු පරපුරක් බිහිකරනු වස් එදා පටන් සිටි මැදි විදු නියමුවරුන් හා ආචාර්ය මණ්ඩලයේ සහය වචනයෙන් විස්තර කළ නොහැකි තරම් අනගිය.
අද මෙන් ම හෙටත්, ඉදිරියටත් සත්කෝරළ පහන් තාරකාවියගේ උණුහුම ලබමින් ඉදිරියට යන්නට, මල් ඇතිරූ විවර කළ මංවල යන්නට සුවහසක් දරුවන්ට හැකි වේවායි යන ඒකායන පැතුමෙන් සමු ගනිමු.
චිරං ජයතු !!!